काठमाडौं, चैत ११ —सूर्य उपासनासँग सम्बन्धित चैती छठ पर्व आज बिहान उदाउँदो सूर्यलाई अर्घ्य अर्पण गरेसँगै सम्पन्न भएको छ। मिथिला क्षेत्रबाट सुरु भएको यो पर्व अहिले देशका विभिन्न जिल्लामा फैलिँदै व्यापक रूपमा मनाइँदै आएको छ।
मधेसका बारा, पर्सा, रौतहट, सर्लाहीलगायत जिल्लामा व्रतालुहरूले नदी, पोखरी तथा जलाशयमा पुगेर श्रद्धा र भक्ति भावका साथ सूर्यदेवको पूजा गरेका छन्। यसैगरी राजधानी काठमाडौंसहित देशका अन्य स्थानहरूमा पनि छठ पर्वप्रति आकर्षण बढ्दै गएको देखिन्छ।
चार दिनसम्म चल्ने यस पर्वमा तेस्रो दिन साँझ अस्ताउँदो सूर्यलाई अर्घ्य अर्पण गर्ने परम्परा छ भने अन्तिम दिन बिहान उदाउँदो सूर्यलाई अर्घ्य दिँदै व्रत समापन गरिन्छ।
वसन्त ऋतुमा मनाइने छठलाई ‘चैती छठ’ भनिन्छ। धार्मिक आस्था र शुद्धताको प्रतीक मानिने यो पर्व कात्तिक महिनामा पनि समान विधिअनुसार मनाइने गरिन्छ।
पछिल्लो समय छठ पर्व मिथिला क्षेत्रबाट बाहिरिँदै देशव्यापी रूपमा फैलिएको छ र विभिन्न समुदायका मानिसहरूले समेत यसलाई श्रद्धापूर्वक मनाउन थालेका छन्।
