माघ ८, २०८२
नेपाली कांग्रेसका नवनिर्वाचित सभापति गगन थापाले नेतृत्व सम्हालेपछि पहिलोपटक पार्टी केन्द्रीय कार्यालय सानेपा (ललितपुर) मा केन्द्रीय कार्यसमितिको बैठक बोलाएका छन्। बैठक शुक्रबार, माघ ९, २०८२ मा बस्ने तय भएको छ।
गत पुस २७–३०, २०८२ मा काठमाडौँको भृकुटीमण्डपमा सम्पन्न कांग्रेसको दोस्रो विशेष महाधिवेशनबाट निर्वाचित केन्द्रीय कार्यसमितिको यो बैठक आफ्नै कार्यालयमा पहिलोपटक बस्न लागेको हो।
यसअघि नवनिर्वाचित कार्यसमितिको पहिलो बैठक माघ १, २०८२ मा कुपण्डोलस्थित म्यासेममा बसेको थियो भने निर्वाचन आयोगबाट पार्टीको आधिकारिक मान्यता प्राप्त भएपछि दोस्रो बैठक माघ ३, २०८२ मा नयाँ बानेश्वरस्थित अर्पण बैंक्वेटमा सम्पन्न भएको थियो।
अब कांग्रेस नेतृत्वले पार्टी सञ्चालनलाई सानेपाबाट संस्थागत रूपमा अघि बढाउने तयारी थालेको छ। केन्द्रीय कार्यसमितिका सचिव केशव दुलालका अनुसार बैठकका लागि पदाधिकारीका कार्यकक्ष व्यवस्थापन तथा कार्यालय सरसफाइको काम भइरहेको छ।
कांग्रेस प्रवक्ता देवराज चालिसेका अनुसार माघ ९ गते बस्ने बैठकले घोषणापत्र लेखन, चुनावी परिचालन रणनीति र निर्वाचन तयारीका लागि उपसमिति गठनजस्ता महत्वपूर्ण निर्णय गर्नेछ। साथै सभापति थापालाई आगामी प्रधानमन्त्रीको उम्मेदवारका रूपमा अघि सार्ने विषयमा समेत छलफल हुने सम्भावना रहेको छ।
यसैबीच, निवर्तमान सभापति शेरबहादुर देउवा पक्षले पार्टीको आधिकारिकता दाबी गर्दै दायर गरेको रिट निवेदनमा माघ ६, २०८२ मा सर्वोच्च अदालतले अन्तरिम आदेश दिन अस्वीकार गरेपछि थापा नेतृत्वले सानेपाबाटै पार्टी सञ्चालनलाई तीव्रता दिने तयारी गरेको देखिएको छ।
