लिपुलेक मुद्दामा काँग्रेसको आपत्ति, विद्यार्थी संगठन सडकमा

काठमाडौं, वैशाख २१ — लिपुलेक हुँदै कैलास मानसरोवर यात्रा सञ्चालन गर्ने विषयमा भारत–चीनबीच भएको सहमतिप्रति नेपाली कांग्रेस ले आपत्ति जनाएको छ भने सोही विषयलाई लिएर विद्यार्थी संगठनहरूले सडकमा प्रदर्शन गरेका छन्।
पार्टीको केन्द्रीय कार्यसम्पादन समितिको बैठकपछि सहमहामन्त्री उदय शम्शेर राणा ले लिपुलेक, लिम्पियाधुरा र कालापानी नेपाली भूभाग भएको विषयमा पार्टीको अडान स्पष्ट रहेको बताए। उनले नेपाल सरकारले भारत र चीनलाई पठाएको कूटनीतिक नोटलाई सकारात्मक रूपमा लिएको उल्लेख गर्दै सीमा विवाद कूटनीतिक माध्यमबाट समाधान गर्नुपर्नेमा जोड दिए।
यसैबीच, लिपुलेक लगायतका क्षेत्रमा भइरहेको भनिएको अतिक्रमणको विरोधमा विद्यार्थी संगठनहरूले काठमाडौंको माइतीघर क्षेत्रमा प्रदर्शन गरेका छन्। संयुक्त विद्यार्थी संगठनको ब्यानरमा भेला भएका प्रदर्शनकारीले राष्ट्रिय स्वाधीनताको रक्षा र अतिक्रमित भूमि फिर्ता ल्याउन माग गरेका हुन्।
प्रदर्शनका क्रममा ‘लिम्पियाधुरा, कालापानी र लिपुलेक हाम्रो हो’, ‘सीमा अतिक्रमण बन्द गर’ लगायतका नारा लगाइएको थियो। उनीहरूले लिपुलेक क्षेत्रमा भइरहेको गतिविधि तत्काल रोक्न र नेपालको भौगोलिक अखण्डताको सम्मान गर्न सरकारसँग माग गरेका छन्।
एकातिर प्रमुख प्रतिपक्षी दलले कूटनीतिक पहललाई प्राथमिकता दिनुपर्ने बताइरहेका बेला अर्कोतर्फ विद्यार्थी संगठनहरू सडकमार्फत दबाब सिर्जना गर्न सक्रिय देखिएका छन्।