३ माघ २०८२, शनिबार | काठमाडौं
नेपाली कांग्रेसका सभापति शेरबहादुर देउवा पक्षले पार्टीको आधिकारिकतासम्बन्धी निर्वाचन आयोगको निर्णयविरुद्ध सर्वोच्च अदालत जाने औपचारिक निर्णय गरेको छ। शनिबार बसेको देउवा समूहको बैठकले कानुनी उपचारसँगै राजनीतिक प्रतिवादलाई पनि सँगसँगै अघि बढाउने निष्कर्ष निकालेको हो।
बैठकपछि निर्णय सार्वजनिक गर्दै नेता प्रकाशशरण महतले निर्वाचन आयोगले प्रक्रिया, नजिर र विधानको पालना नगरी विशेष महाधिवेशन पक्षलाई आधिकारिकता दिएको आरोप लगाए। आयोगले आफूहरूलाई औपचारिक रूपमा नसोधीकनै एकपक्षीय निर्णय गरेको भन्दै त्यसलाई अन्यायपूर्ण ठहर गरिएको उनले बताए।
महतका अनुसार देउवा समूह आइतबार नै सर्वोच्च अदालतमा रिट दायर गर्ने तयारीमा छ। “निर्वाचन आयोगको निर्णयले मात्रै आधिकारिकता स्थापित हुँदैन,” उनले भने, “हामी कानुनी बाटो र राजनीतिक प्रतिवाद दुवै अपनाउँछौं।”
उनले पार्टीभित्र र बाहिर विभिन्न स्वरूपका राजनीतिक गतिविधिबारे छलफल भइरहेको पनि जानकारी दिए। आयोगको निर्णयसँग असन्तुष्टि जनाउँदै देउवा पक्षले यो विवाद अदालतबाटै टुंगो लगाउनुपर्ने निष्कर्ष निकालेको हो।
शुक्रबार निर्वाचन आयोगले विशेष महाधिवेशनबाट निर्वाचित गगन थापा समूहलाई नेपाली कांग्रेसको आधिकारिकता दिएको थियो। सो निर्णयपछि थापा समूहले पार्टी गतिविधि सक्रिय बनाइसकेको छ भने पार्टीको केन्द्रीय कार्यालय हाल देउवा पक्षकै नियन्त्रणमा रहेको छ।
कांग्रेसभित्रको यो विवाद अब राजनीतिक सीमाभन्दा बाहिर निस्कँदै न्यायिक क्षेत्रमा प्रवेश गरेको छ, जसले आगामी दिनमा पार्टीको दिशा र आन्तरिक शक्ति सन्तुलनमा ठूलो प्रभाव पार्ने देखिन्छ।
