बारा|१४ माघ २०८२
बाराको परवानीपुर गाउँपालिका–१ रहरियाडीमा गएराति भएको एक दर्दनाक घटनामा आमा–छोराको हत्या भएको छ भने परिवारका अन्य तीन सदस्य घाइते भएका छन्।
मृत्यु हुनेमा ३२ वर्षीय रामेश्वर मण्डल र उनकी ५२ वर्षीया आमा सुमित्री देवी रहेको प्रहरीले जनाएको छ। रामेश्वरका बुवा जगरुक मण्डल गम्भीर घाइते छन्।
घरभित्रै पसेर आक्रमण
जिल्ला प्रहरी कार्यालय बाराका प्रहरी उपरीक्षक (एसपी) नरेन्द्र कुँवरका अनुसार आज बिहान करिब ३ बजे एक व्यक्ति घरभित्र प्रवेश गरी धारिलो हतियार प्रयोग गरेर अन्धाधुन्ध आक्रमण गरेको प्रारम्भिक जानकारी प्राप्त भएको छ। आक्रमणपछि आमा–छोराको घटनास्थलमै ज्यान गएको बताइएको छ।
घाइतेको उपचार जारी
आक्रमणमा घाइते भएका तीन जनाको परवानीपुरस्थित एलएस न्युरो अस्पतालमा उपचार भइरहेको छ। उनीहरूको अवस्था बारे थप विवरण आउन बाँकी रहेको प्रहरीले जनाएको छ।
अनुसन्धान सुरु
प्रहरी टोली घटनास्थलमा पुगेर अनुसन्धान सुरु गरिसकेको छ।
एसपी कुँवरले भने,
“हामी घटनास्थलमै छौं। राति घरभित्र पसेर धारिलो हतियार प्रहार भएको प्रारम्भिक तथ्य खुलेको छ। घटनाको कारण र संलग्न व्यक्तिबारे अनुसन्धान भइरहेको छ।”
घटनाले स्थानीय क्षेत्र त्रसित बनेको छ भने दोषीलाई चाँडै पहिचान गरी कारबाही गर्ने प्रहरीले जनाएको छ।
