८ दिनपछि भग्नावशेषबाट जीवितै निस्किए हर्नान गिल, भेनेजुएलाको उद्धार अभियानमा चमत्कार

काठमाडौं, असार १९ — भेनेजुएलामा गएको विनाशकारी भूकम्पपछि आठ दिनसम्म भग्नावशेषमुनि फसेका एक व्यक्तिको जीवितै उद्धार गरिएको छ। अत्यन्त जोखिमपूर्ण र जटिल मानिएको उद्धार अभियानपछि हर्नान गिललाई सुरक्षित रूपमा बाहिर निकाल्न सफल भएपछि घटनालाई ‘चमत्कारिक उद्धार’का रूपमा हेरिएको छ।
अन्तर्राष्ट्रिय सञ्चारमाध्यमका अनुसार गिल करिब १४० टन भग्नावशेषमुनि फसेका थिए। उद्धार टोलीले उनको अवस्थिति पत्ता लगाएको चार दिनभन्दा बढी समयपछि सावधानीपूर्वक भग्नावशेष हटाउँदै उनलाई सुरक्षित बाहिर निकालेको हो।
गत जुन २४ मा भेनेजुएलामा आएका दुई शक्तिशाली भूकम्पका कारण हालसम्म करिब २,३०० जनाको मृत्यु पुष्टि भइसकेको छ भने हजारौँ मानिस अझै बेपत्ता छन्। प्रभावित क्षेत्रमा खोज तथा उद्धार अभियान निरन्तर जारी छ।
सुरक्षा कक्षले बचायो ज्यान
भूकम्प आएको बेला हर्नान गिल कातिया ला मारस्थित एक सपिङ मलसँग जोडिएको पार्किङ क्षेत्रको बेसमेन्टमा रहेको सानो सुरक्षा कक्षमा ड्युटीमा थिए। प्रारम्भिक अनुसन्धानअनुसार उक्त कङ्क्रिट संरचनाले सुरक्षात्मक आवरणको काम गरेकाले उनीमाथि खसेको विशाल भग्नावशेषबाट जोगिन सफल भएका थिए।
उद्धारका क्रममा सानो प्वाल बनाएर उनलाई पानी, अक्सिजन र आवश्यक औषधीय उपचार उपलब्ध गराइएको थियो। चिकित्सकहरूले सलाइनसमेत जोडेर उनको स्वास्थ्य अवस्थालाई स्थिर राखेका थिए।
आवाज सुनेपछि सुरु भयो आशा
उद्धार अभियानमा संलग्न कोस्टारिकाका प्यारामेडिक एलन माड्रिगलले पहिलो पटक भग्नावशेषभित्रबाट गिलको क्षीण आवाज सुनेपछि उनी जीवित रहेको पुष्टि भएको बताए। त्यसपछि उद्धार टोलीले विशेष उपकरणको प्रयोग गर्दै अत्यन्त सावधानीपूर्वक उद्धार अभियान तीव्र बनाएको थियो।
उद्धारमा संलग्न एक चिलीका अग्निनियन्त्रकका अनुसार यो आफ्नो जीवनकै सबैभन्दा कठिन र प्राविधिक रूपमा जटिल उद्धार अभियानमध्ये एक थियो।
सात देशका उद्धार टोलीको संयुक्त प्रयास
गिलको उद्धारका लागि भेनेजुएलासहित चिली, कोस्टारिका, एल साल्भाडोर, मेक्सिको, पोर्चुगल र संयुक्त राज्य अमेरिकाका उद्धार टोलीहरूले संयुक्त रूपमा काम गरेका थिए। भग्नावशेषभित्र पुग्न बनाइएका सुरुङहरू पटक–पटक भत्किँदा अभियान थप जोखिमपूर्ण बने पनि टोलीले निरन्तर प्रयास जारी राख्यो।
उद्धारअघि सानो क्यामेरा पठाएर गिलको अवस्था अवलोकन गरिएको थियो। धुलोबाट जोगाउन उनलाई मास्क र आँखाको सुरक्षाका लागि चस्मासमेत उपलब्ध गराइएको थियो।
उद्धारपछि मेक्सिको रेडक्रसका एक सदस्यले हर्नान गिललाई ‘उत्साही र हँसिलो स्वभावका व्यक्ति’ भन्दै कठिन परिस्थितिमा पनि उनले अद्भुत साहस र धैर्यता देखाएको बताएका छन्।